Разь верма не висьтавны кыв?

Апрель, мӧдӧдз лун. Ме ола деревняын, кера ассим удж, кӧр видзӧта телевизор, кывза радио. И вдруг пеллез кутісӧ нёштӧм юӧр: тӧн кулӧма пӧ миян гижись-классик В.В.Климов. Жыв меным умӧль лоис, горшын бергӧтчис тшакыль, а сэсся ни думайтышті: быд морт коляс этӧ мусӧ. А Василий Васильевич оліс кузь олан, оліс бытшӧма и кольччас ме понда пыр кежӧ примерӧн. Ме жӧ кӧсъя быд мортлӧ ӧтікӧ: эм кӧ тіян дед, ай, зон, зять, вон, жӧник, ёрт – мед вӧлі сія сэтшӧмӧн жӧ, кыдз В.Климов.

Первуись эта морткӧт тӧдсаси ме письмоэз пыр 1979 годӧ. Да, сідз и вӧлі, кӧр понді велӧтчыны Перемын пединститутын. Гижлывлі кывбуррез да юморескаэз эшӧ школасянь, но некинлӧ эг мыччавлы. А сэк решиті иньдыны Кудымкарӧ. И сідз кыдз этӧ литературнӧй произведеннёэз (ась и кытчӧдз, поди, слабӧйӧсь), «Парма» газетасянь нійӧ сетлывлісӧ литературнӧй консультантлӧ. Конечно, некытшӧм письмо ме эг видзчись некинсянь, но Василий Васильевич сетіс ответ. А сэсся ме иньдывлі сылӧ ни эшӧ мӧдік произведеннёэз. Сія жӧ сё мекӧт  письмоасис, велӧтіс, кыдз правильнӧя колӧ гижны, мый вылын колӧ уджавны, мед шогмис бытшӧм литературнӧй произведеннё. Содта, что эна письмоэс, кӧдна датируйтӧмась 80-ӧй годдэзӧн, куйлӧны гортын ӧнӧдз.

Кӧр ме локті  округӧ институт бӧрсянь, Василий Васильевич сэксянь часто корлывліс менӧ собраннёэз да заседаннёэз вылӧ, кӧдна чулавлісӧ гижиссезлӧн. Сэк ме и тӧдсаси первуись С.Можаевкӧт, И.Мининкӧт, М.Вавилинкӧт, В.Баталовкӧт, Г. Бачевакӧт, Т.Фадеевкӧт, С.Федосеевкӧт, Н.Бормотовкӧт да мӧдіккезкӧт. Пукавлі ме ныкӧт ордчӧн кузь пызан сайын, кывзі да видзӧті ны сьӧрын. Да и мӧднеж эг вермы: а кин ме сэтшӧмыс? Но кадыс чулаліс, и ӧні ачым коми-пермяцкӧй литератураас куимдас ӧкмыс год ни.

Мый эшӧ оз мун юрвемись –  ӧтік баитӧм. Кӧр менам петіс медодзза книга, кыдзкӧ гижиссез ӧксисӧ кытшӧмкӧ заседаннё вылӧ медодзза лицейын. И сэтчӧ пуксьыштіс бокам Василий Васильевич. Баитчышта бы пӧ тэкӧт, Василий. Кывза, шуа, тіянӧс. Сія жӧ корис, мед ме гижи заявленнё Россияись гижиссезлӧн Союзӧ. Ме жӧ паныт, что менам только ӧтік кытчӧдз книгаӧ да и мый, мыся, сетас меным эта Союзыс. Василий Васильевич местаын мӧдік видіс бы менӧ нето иньдіс ылӧжык, а сія спокойнӧя (кыдз и пыр) содтіс, ась пӧ и медодзза книга, но эта проблемаыс сылӧн ни. И ме бы пӧ эг лок эттшӧм предложеннёӧн тэ дынӧ, сідз кыдз унаӧн пондывлісӧ гижны да сідз жӧ и казявтӧг кытчӧкӧ сывлісӧ, но ме адзза, что тэ литератураас пырин асмоза, необычнӧя и, думайта, дыр кежӧ. И тӧд пӧ, что Россияись гижиссезлӧн Союзӧ примитӧны не быдсӧ.

Конечно, сэк ме заявленнёсӧ эг гиж, том эшӧ вӧлі, уна мый эта кухняись эг вежӧрт. Баита жӧ бы талун и вот эшӧ мый йылісь. Кытшӧм сё жӧ сія вӧлі скромнӧй, простӧй мортӧн (ме некӧр эг кыв сысянь нёштӧм кыв, мед кинкӧ вылӧ сія горӧтіс), мымдалӧ сія отсаліс олан пыр, осьтіс литератураӧ туй.  А эд гижиссез коласын вӧлісӧ сэтшӧмӧсь, кӧдна эз лэдзӧ литератураас виль ниммесӧ, талисӧ-ровняйтісӧ том таланттэсӧ мукӧт. Но да ась, кӧркӧ сё ни эта понда сетасӧ ответ. Да мый унасӧ баитны, кӧр ачымӧс «Иньва» сборникын эз печатайтӧ кыкдас сизим год сьӧрна!

Кӧть Василий Васильевич унасӧ эз баит, но кӧр мийӧ сыкӧт вӧвлім ӧтнаным кытӧнкӧ али сы ордын, ӧті-мӧді йылісь ме юасьлі. Пример туйӧ, дружнӧя я нія овлісӧ ӧтамӧд коласын, сія горӧтчис, что быд коллективын овлӧны конфликттэз, споритӧммез. А сэсся ни серӧмтчис да содтіс: эз пӧ лӧсявлӧ Минин Боталовкӧт. Мыля? Но эта йылісь кыдзкӧ нёштӧм талун юӧртны.

Жагӧник кадыс чулалӧ одзлань. Кинкӧ чужӧ, кинкӧ кулӧ. Вот и Василий Васильевич, кӧдаӧ ог бы верит, талун абу мекӧт ордчӧн. А эг бы уджав литератураын, эг бы и тӧд этӧ удивительнӧй мортсӧ-энциклопедиясӧ.  Талун жӧ кольччӧ висьтавны, что не быд морт ас бӧрсянь кольӧ бур следсӧ. А Василий Васильевичӧс пондасӧ тӧдны и донтны эшӧ не ӧтік поколеннё. Да и не весь тай баитсьӧ, что бур мортыс пӧ оз кув, ордчӧн только сія тэкӧт абу. Ась сідз и лоӧ менам дона морткӧт, велӧтіськӧт, ёрткӧт. Да и верма я вунӧтны эттшӧм тӧдчана необычнӧй ыджыт буквасянь талантливӧй мортсӧ, кӧдӧ окыштӧма жыв ачыс Еныс?

В.Кольчурин

Медбӧрьяись Василий Васильевичкӧт ме баитси Пешнигортын, культура керкуын, кӧр сылӧ тырис ӧкмысдас год. Этӧ вӧлі 2017 год. Мӧді кежавны кӧр-нибудь гортас, но сія корис, мед эг ни кай сы дынӧ, ме пӧ умӧля адзза ни да и кыла. Быдӧс пӧ тэныт бурсӧ да эн дышӧтчы гижны, гажӧт пӧ отирсӧ аслат гижӧмӧн, эд юмористика миян тожӧ богат, и некин некӧр сэтӧн унасӧ эз уджав. А тэнат пӧ эта неумӧля шогмӧ.

Апрельлӧн мӧдӧдз лун, 2020г.