Касьтылӧммез

Сэтшӧм сія вӧлі морт

Эна луннэзӧ А.И.Шадринлӧ тырис бы кватьдас квать(66)год. Кыдз сё жӧ чулалӧ кадыс! Да, мунӧны миян дынісь жагӧникӧн тӧдсаэз, кулӧны. Нем он кер — природалӧн закон. Тыдалӧ, и сэтчин тожӧ колӧны бур морттэс, кытшӧмӧн вӧлі Александр Иванович. 

Эта морткӧт ме тӧдсаси «Парма» газетаын уджавтӧн. Пукалім сыкӧт ӧтік кабинетын, нельки пызаныс сулаліс меным паныт. 

Мый позис висьтавны недыр мыйись эта морт сьӧрті? Кытшӧм сія вӧлі? Эмӧсь морттэз, кӧдна сьӧрті нем и висьтавны бурсӧ. Сэтшӧммесӧ адззылі и газетаын. И пустӧйӧсь, и культуратӧмӧсь, нельки кӧднакӧт эг бы  и пукав ӧтік кабинетын али эг и шыась.  Но олан меным козьналіс нёль морткӧт пантасьӧм, кӧдна кольччасӧ юрвемын пыр кежӧ. Этӧ не просто тӧдсаэз, этӧ мыйкӧ ме понда унажык. Дженыта кӧ висьтавны, этӧ нія, кинсянь вӧлі желаннё босьтны ас понда быдӧс бурсӧ. Ме ныкӧт уджалі или велӧтчи ны дынын, пантасьлі быд лун, кинкӧт письмоасьлі. Этӧ ученӧй Е.В.Ботева, классик-гижись В.В.Климов, кӧркӧся «Коми-Пермяцкая» ГТРК-лӧн веськӧтлісь В.С.Петров и менам заметкалӧн герой А.И.Шадрин. 

Александр Иванович — а коллективын сійӧ шуисӧ Сашаӧн, мый ме эг вермы шуны — вӧлі ӧддьӧн скромнӧй мортӧн. Годдэз сьӧрна ме некӧр сысянь эг кыв нёштӧм кыв, сія некӧр некинкӧт эз спорит, эз видчы, эз горӧт. И кӧть тӧдіс, что кинкӧ, шуам, медумӧль морт, кокнит мывкыда инька нето юись, но сія некӧр эз висьтав, что мортыс умӧль. Конечно, ас понда кытшӧмкӧ выводдэз сё ни керас морт сьӧрті, но гусьӧн, аскӧттяс.

Мукӧдпыр ме дырӧн видзӧті сы сьӧрын и думайті: мымда сё жӧ сыын быдкодь талантыс, кытшӧм сія скромнӧй, спокойнӧй, простӧй, ответственнӧй, культурнӧй, рам сьӧлӧма. Киннэзкӧ, кӧдна уджалісӧ сэк ордчӧн сыкӧт, адззисӧ этӧ и эзӧ, эм тай пӧ морт да и ась уджалӧ, но менам думаэз вӧлісӧ нач мӧдікӧсь. 

Ме некӧр ог вунӧт, кыдз сія газетаись муніс бӧр. Сылӧн вӧлі отпуск, а кӧр петіс вились удж вылӧ, сэк жӧ гижис заявленне. Менам вопрос вылӧ, мый лоис, сія горӧтчис (унасӧ некӧр эз баит): не тэныт пӧ висьтавны, сэсся ог вермы. И былись, кыдз творческӧй мортлӧ, сылӧ эз тырмы свобода, сылӧ охота вӧлі мукӧдпыр вӧвны ӧтнаслӧ, думайтны, гижны. Сійӧ нырыштіс уджалан графикыс, не сьӧлӧмви вӧлі гижны газетаӧ сы йылісь, мый коліс, адззыны коллективын мукӧдпыр мукӧдлісь нёштӧм поступоккез и быдкодь несправедливость, кӧда олананым ӧнӧдз тырмӧ. Натьтӧ, этасянь сы синнэзын позис адззыны часто гажтӧм настроеннё. И кыдз висьталіс эттшӧм морттэз сьӧрті ӧтік ученӧй, нылӧ некокнит овны эта оланын.  

Оліс и муніс оланісь мортыс гусьӧна. Но менам сьӧлӧмын сія кольччас пыр кеж. Кытчӧдз жӧ, кӧр тӧдвылӧ усяс эта мортыс, босьта киӧ сылісь книга и лыддьӧта. Нельки сы строчкаэз пыр адзза небыт рам кывсӧ, кӧда содтӧ олікӧ вын, велӧтӧ кошшыны оланын бытшӧм ладорсӧ. А эшӧ керны эта оланын мӧдіккез понда кӧть невна бурсӧ.

В.Кольчурин

2017 год