Шадрин Иван Алексеевич
Мед эз кус сылӧн бичир
Февраль 20 лунӧ коми-пермяцкӧй гижись Иван Алексеевич Шадринлӧ чужан лунсянь тырис бы 85 год. Лоас небасӧк, ог кӧ уськӧтӧ тӧдвылӧ этӧ нимсӧ, ог кӧ висьталӧ сы йылісь эшӧ кынымкӧ кыв. И ась сія бичирыс, кӧдӧ ӧзтіс эта талантливӧй мортыс, ӧгралӧ отир сознаннеын эшӧ уна годдэз.
Эта морт тӧдса уна отирлӧ сійӧн, что эшӧ школаын велӧтчикӧ учебнӧй программаӧн сетсисӧ сылӧн кык произведеннё – «Честь» да «Дёма» повесттез. Конечно, ме бы шуи, что этӧ етшаӧв. Но и эна произведеннёэз сьӧрті позис ни керны кытшӧмкӧ вывод сы творчество сьӧрті.
Кадыс оз сулав местаас. Вот и медбӧрья годдэзӧ школаэзӧ локтісӧ коми-пермяцкӧй литература сьӧрті виль учебниккез. И только кватьӧт классын гижись И.Шадринлӧн сетӧма «Дёма» повесть. Сэсся нем абу. А разь етша сія гижис рассказзэз, очерккез? Умӧль и сія, что учебникись оз позь адззыны авторлісь не биография, не портрет. Вот этадз и донтам гижисьӧс, сылісь талант.
Но талун баитышта бы мӧдік йылісь. Автор йылісь мийӧ тӧдам зэв ни етша. Эта могись талуння миян гӧсь – инькаыс, кӧда олӧ Кудымкарас и кӧдалӧ таво тырӧ 87 год.
– Анна Ивановна, висьтасьӧ, кыдз тійӧ Иван Алексеевичыскӧт тӧдсасит?
– Ме ачым быдми, олі Кудымкарас. Эшӧ томыникӧн пондӧтчи уджавны типографияас наборщицаӧн. А Иван Алексеевич сэк уджаліс издательствоас. Сія часто кежавліс миян дын. Вот сідз и тӧдсасим.
– А сэсся ?
– Думайта, 1934 годӧ ӧтлаасим. Нія годдэзӧ округаным районнэзын пондісӧ оссьыны редакцияэз. Сідз мийӧ сюрим Юсьваӧ, пондім лэдзны газета. Сэтчинсянь сія и муніс армияӧ. Эта кадӧ миян вӧлісӧ ни кык челядь. Кӧр бертіс бӧр, мымдакӧ олім и уджалім Соликамскын, тожӧ лэдзим газета. А сыбӧрын сійӧ босьтісӧ фронт вылӧ.
– Мый вӧлі одзлань, война бӧрсянь?
– Бӧра жӧ уджалім газетаын, но татӧн ни. Сэсся мымдакӧ издательствоын. Ӧні ме пӧрись ни лои, кытӧн мый невна верма сорасьыштны.
– Тӧда, Иван Алексеевичлӧ эз вӧв и витдасыс, кыдз сія куліс 1962 годӧ…
– Война бӧрсянь сія часто пондіс шогасьны. Етша ни уджаліс, унажыксӧ куйліс больницаын. А сыбӧрын туберкулёз сійӧ нырыштіс, ноябрь месяцӧ.
– Висьталӧ кынымкӧ кыв челядь йылісь…
– Нія миян кватя, кык ныв и нёль зон. Быдӧнныс олӧны Кудымкарас. Эмӧсь менам внучеккез, эм и правнук ни. А медыджыт зонӧ быдӧсӧн вачкисьӧ айыс вылӧ.
– Кинкӧ, поди, кыдз айныс жӧ, гижӧ?
– Эз тай пондылӧ некин. Абу, тыдалӧ, Еныс сетӧм сэтшӧм талантӧ некинлӧ. Но кинӧн бы нія эз вӧлӧ, мед бытшӧм морттэзӧн кольччисӧ. А этӧ мед ни бур.
– Школаын велӧтчикӧ быд морт тӧдсасис сы «Дёма» повестьӧн. Кыдз тійӧ думайтат, кин вермис лоны главнӧй геройлӧн прототипӧн?
– Думайта, ачыс. Иван Алексеевич висьтасьліс, что олӧмась-быдмӧмась ӧддьӧн сьӧкыта. А велӧтчӧмыс сылӧ, тыдалӧ, сетсис кокнита. Айыс ӧм абу сетӧм осьтны, кӧр зоныс мӧдӧм мунны велӧтчыны одзлань. Сія лыддьӧм, что зоныслӧ грамотаыс оз ков, сідз пӧ гортын уджыс тырмӧ. Но кыдз бы сьӧкыт эз вӧв, а Иван Алексеевич сё жӧ получитӧм образованнёсӧ.
– Анна Ивановна, кытшӧмӧн Иван Алексеевичыс тіян памятьын кольччис кыдз морт?
– Сія вӧлі ӧддьӧн спокойнӧй. Не менӧ, не челядьсӧ некӧр эз ӧбидит. Вӧвлі, кӧр невна юыштыштас винасӧ, но эз шумитлы. Содта, что сія стрась радейтіс чериавны, челядьсӧ мукӧдпыр сьӧрас кыскавліс. Ӧтік кылӧн, вӧлі обыкновеннӧй простӧй мортӧн.
Ассяням ни содта, что А.И. Шадрина олӧ Лазо нима улицаын, неылын окружнӧй библиотекасянь. Керку важ ни. Этӧ керкусӧ, кӧда кӧркӧ сулалӧм Шадрина деревняын и кытӧн быдмӧм гижисьыс, война бӧрсяняс лэдзчӧтӧмась Кудымкарас. Оланін лажмытӧв, ыджыткодь, нёль комната. Неыджыт прихожӧй, эм ком, кухня.
«Парма» газета, февраль 17 лун, 2000 год.
Баитсис В.Кольчурин
Талуння лунӧ гижисьлӧн эта керкуыс абу ни, сы местаын строитӧмась неыджыт постройкаэз, нылыс пӧ видзӧ дача туйӧ.